Naxçıvan Muxtar Respublikasının Babək rayonunda 2007-ci il təvəllüdlü Mahir yetkinlik yaşına çatmayan Aydanla (adlar şərti verilib – red.) intim münasibətdə olmaqda ittiham edilib.

Hadisə bu il aprelin 20-də baş verib.

Mahir saat 23:45-də ailə qurmaq məqsədi ilə 2010-cu il təvəllüdlü Aydanı yaşadığı kənddən qaçırıb və öz yaşadığı digər kəndə aparıb.

İstintaq orqanı tərəfindən Mahirin barəsində Cinayət Məcəlləsinin 152.1-ci (on dörd yaşına çatmış, lakin on altı yaşına çatmayan şəxslə cinsi əlaqədə olma və ya seksual xarakterli digər hərəkətlər etmə) maddəsi ilə ittiham elan edilib.

“Əvvəl dost idik”

İş üzrə ifadə verən Mahir elan olunmuş ittiham üzrə özünü təqsirli bilib. İfadəsində göstərib ki, Aydanla 7-ci sinifdə oxuduğu gündən ünsiyyətləri olub:

“Onu 2 ildir tanıyıram. Özüm Babək rayonun başqa kəndində yaşayıram. Aydanın yaşadığı kəndə fəhlə işləməyə getmişdim. Orada onu gördüm, əvvəl dost münasibət saxladıq. Bir il idi ki, sevgili münasibətindəydik. Aydanın 15 yaşında olduğunu, orta məktəbdə təhsil aldığını və 9-cu sinifdən məktəbdən çıxdığını bilirdim”.

Təqsirləndirilən şəxsin sözlərinə görə, Aydanı ilk dəfə 2024-cü ilin dekabrın 31-də qaçırıb: “Amma yaşımızın az olduğundan hər iki ailə evlənməyimizə razı olmadı. Mən Aydanı ailə qurmaq məqsədilə qaçırmışam, hər şeyi qabaqcadan planlaşdırmışam”.

Mahir bildirib ki, işdə adı keçən Əli ilə dost olub və bir yerdə işləyiblər:

“Aprelin 20-də Aydan mesaj yazaraq ailəsinin onu Sumqayıt şəhərinə göndərmək istədiyini, lakin özünün getmək istəmədiyini bildirdi. Bundan sonra Aydanı qaçırmaq barədə Əliyə bildirdim, ondan bizim qalacaq yerinin olub-olmadığını soruşdum. O da yer olmadığını söylədi. Daha sonra mənə dostunun evində qala biləcəyimizi dedi”.

“Polislər səhəri gün zəng etdilər”

Mahir qeyd edib ki, aprelin 20-də axşam saatlarında Aydanı qaçırmaq barədə razılaşıblar: “Öncə Əli ilə kənd məktəbinin yanına getdik. Bir qədər sonra Aydan oraya gəldi. "Bolt"dan taksi sifariş edərək Cəhri qəsəbəsinə Əlinin dostunun evinə getdik.

Evin həyət qapısı bağlı olduğundan divardan tullanaraq arxa tərəfdən həyətə daxil olduq. Əli ikinci mərtəbəyə qalxaraq pəncərənin şüşəsini çıxardı, evə daxil olub qapını içəridən açdı. Biz də evə daxil olduq.

Həmin gün orada gecələdik. Əli ilə eyni otaqda qaldıq. Mən Aydanla yataqda, Əli isə divanda yatdı”.

Mahir bildirib ki, Aydanla cinsi əlaqədə olmaq barədə əvvəlcədən özü ilə razılaşıb və həmin gün axşam onunla cinsi əlaqədə olub: “Bu zaman Əli səsə oyandı. Belə bir niyyətimdən onun xəbəri yox idi.

Səhəri gün Əligilin evinə getmək istəyəndə polislər zəng edərək bizi şöbəyə çağırdı. Şöbədə Aydanın anasının polisə şikayət etdiyini öyrəndim. Törətdiyim əməli etiraf etdim. Aydanla əlaqədə olduğuma görə ailələrimiz artıq bizim izdivacımıza razı oldular”.

“Mənə yaylıq gətirdilər, anam razı olmadı”

İş üzrə zərərçəkmiş Aydanın sözlərinə görə, təhsillə bağlı 10-cu sinfə keçməli imiş: “Bu məsələdən sonra anamın ərizəsi əsasında məktəbdən çıxdım. Mahirlə aramızda sevgi münasibətləri var. İki ildir bir-birimizi tanıyırıq.

Mahir yaşadığım kənddə fəhlə işləyirdi. Bu zaman tanış olduq. Mahirin ailəsi əvvəl mənə yaylıq gətirdi. Amma anam razılıq vermədi və yaylığı qaytardı”.

Aydan qeyd edib ki, aprelin 20-də Mahirə görə anası ilə aralarında mübahisə yaranıb: “Anam məni Sumqayıta, atamın yanına göndərəcəyini dedi. Atam 13 ildir bizdən ayrı yaşayır. Həmçinin anam telefonumu əlimdən aldı, yaşım az olduğuna görə Mahirlə danışmağıma qadağa qoydu.

Mahirlə münasibətimə anam və qardaşım razı deyildi. Həm də atamın yanına getmək istəmirdim. Buna görə Mahirlə könüllü qoşularaq qaçdım”.

Bu cinayət işinə Babək Rayon Məhkəməsində baxılıb. Məhkəmənin hökmü ilə Mahir 1 il müddətinə azadlıqdan məhrum edilib. Cəzasını ümumi rejimli cəzaçəkmə müəssisəsində çəkməsi müəyyən edilib.

Təqsirləndirilən şəxsin barəsində seçilmiş başqa yerə getməmək haqqında iltizam qətimkan tədbiri ləğv edilib və həbs qətimkan tədbiri seçilib. O, məhkəmə zalında həbsə alınıb.

Hökmlə razılaşmayan təqsirləndirilən şəxsin müdafiəçisi apellyasiya şikayəti verib. Müdafiəçi təqsirləndirilən şəxsin barəsində Cinayət Məcəlləsinin 70-ci maddəsi tətbiq edilməsini, şərti məhkum olunmasının, 10 ay sınaq müddəti müəyyən olunmasını xahiş edib.

Eyni tələblə zərərçəkmiş şəxsin qanuni nümayəndəsi də müraciıət edib. Hər iki şikayətə Naxçıvan Muxtar Respublikası Ali Məhkəməsinin cinayət kollegiyasında baxılıb. Şikayəti araşdıran hakimlər heyəti qərar elan ediblər. Şikayətlər təmin olunmayıb./Teleqraf