Prezident Donald Tramp ABŞ hökumətinə maliyyəçi Cefri Epşteynlə bağlı materialların dərc olunması tələbi ilə Konqres tərəfindən bəyənilmiş qanun layihəsini imzalayıb.

MİNATV.AZ xəbər verir ki, ABŞ lideri bu barədə noyabrın 19-da "Truth Social" sosial şəbəkəsində məlumat verib.

Tramp bildirib ki, yetkinlik yaşına çatmayanların təhqir edilməsində ifşa olunmuş və daha sonra intihar etmiş Epşteynlə bağlı materialların dərc olunması haqqında qanun layihəsini imzalayıb. ABŞ prezidenti maliyyəçinin demokrat olduğunu və bu partiyanın siyasətçilərinin maraqlarına minlərlə dollar ianə etdiyini vurğulayıb. Onun sözlərinə görə, Epşteyn, xüsusilə demokratlardan olan bir çox tanınmış şəxslə sıx təmasda olub. Onların arasında Tramp ABŞ-nin 42-ci prezidenti Bill Klintonun və Nümayəndələr Palatasının demokratik azlığının lideri Hakim Cefrisin adlarını çəkib. Trampın sözlərinə görə, Cefris Epşteynə qarşı ittihamlar irəli sürüldükdən sonra ondan özünün seçki kampaniyasına ianə verməsini xahiş edib.

Prezident vurğulayıb ki, demokratlarla Cefri Epşteynin əlaqələri haqqında həqiqət tezliklə üzə çıxa bilər. Tramp xatırladıb ki, özü də ABŞ qanunvericilərini həmin qanun layihəsini təsdiqləməyə çağırıb. Sənədə əsasən, ABŞ Ədliyyə Nazirliyi sözügedən materialları 30 gün ərzində açıqlamalıdır.

Tramp, həmçinin əlavə edib ki, sözügedən qurum maliyyəçinin işi ilə bağlı, təxminən, 50 min səhifəlik sənədi onun göstərişi ilə artıq Konqresə təqdim edib. Tramp bir daha əmin olduğunu bildirib ki, bu materialların dərc edilməsini demokratlar məhz diqqəti onun administrasiyasının uğurlu fəaliyyətindən yayındırmaq üçün tələb edirlər və bu da demokratların özlərinə qarşı çevriləcək.