Götürdüyüm borcu tam şəkildə ödəməyə hazıram. Amma o, evimi qaytarmaq istəmir. Mənim ailəm isə illərdir kirayələrdə sürünür
Bu ifadələr Sabirabad rayonu V. Əhmədov küçəsi döngə 1, ev 33 ünvanda qeydiyyatda olan Mustafayev Yaşar Ağavəkil oğlunun başda dövlət başçısı olmaqla bir sıra yüksək instansiyalara ünvanladığı və eyni zamanda Yenixeber.org-un elektron poçtuna daxil olan müraciətində yer alır...
Müraciəti olduğu kimi dərc edirik:
Mən, Sabirabad rayon sakini Mustafayev Yaşar Ağavəkil oğlu, böyük bir haqsızlıqla üzləşmişəm. Buna görə mətbuat vasitəsi ilə cənab Prezident İlham Əliyevə, Mehriban xanım Əliyevaya, Baş Prokuror cənab Kamran Əliyevə, Elm və Təhsil Naziri cənab Emin Əmrullayevə və Azərbaycan Dövlət İqtisad Universitetinin rektoru cənab Ədalət Muradova müraciət ünvanlayıram.
2016-cı ilin fevralında Azərbaycan Dövlət İqtisad Universitetinin müəllimi, həm də “Heba Consulting” MMC-nin rəhbəri Vüsal Quliyev ilə aramızda kredit müqaviləsi imzalanmışdı. Sənəddə 211 min manat göstərilsə də, əslində mən cəmi 170 min manat nağd pul almışdım. Müqavilədə faizsiz yazılsa da, o pulu 4% faizlə hesablamışdı. 10 ay ərzində hər ay 6800 (altı min səkkiz yüz) manat ödəməklə 68000 (altmış səkkiz min) manat ödəməyimə baxmayaraq, işimlə bağlı ölkədən kənarda olduğum müddətdə mənim evim əlimdən alındı.
Söhbət Bakı şəhəri, Nərimanov rayonu, Akademik Mirəli Qaşqay küçəsində yerləşən, ailəmin yaşadığı 5 otaqlı, böyük sahəsi olan mənzildən gedir. Vüsal Quliyev məhkəmənin yekun qərarını gözləmədən icraçılarla birgə ailəmi evdən çıxarıb. Daha sonra isə həmin mənzil guya 400 min manat dəyərində qiymətləndirilib, amma hərracda süni şəkildə ucuzlaşdırılıb və 255 min manata elə onun özünə satılıb. Halbuki bu mənzilin bazar dəyəri azı 800 min manatdır.
Mən dəfələrlə demişəm ki, götürdüyüm borcu tam şəkildə ödəməyə hazıram. Amma o, evimi qaytarmaq istəmir. Mənim ailəm isə illərdir kirayələrdə sürünür. Vüsal Quliyev isə açıq-aşkar deyir: “Mənim pulum, şirkətim, arxamda adamlarım var”.
Bir müəllim üçün belə sözlər, belə hərəkətlər ayıbdır. Müəllim cəmiyyətə nümunə olmalıdır, kiminsə haqqını tapdalamamalıdır. Heydər Əliyev demişdi: “Mən dünyada müəllimdən yüksək ad tanımıram”. Mənim evimi əlimdən alan adam isə müəllim adını ləkələyir.
Mən, sadə bir vətəndaş olaraq, cənab Prezidentə və aidiyyəti dövlət orqanlarına müraciət edirəm:
Mənim borcumu tam ödəməklə, mənzilim özümə geri qaytarılsın və milyonların sahibi olan “Heba Consulting” MMC-nin rəhbəri Vüsal Quliyevin bu qanunsuz əməlləri ciddi araşdırılsın.
Qarşı tərəfin cavab haqqını tanıyırıq.