Xəbər verdiyimiz kimi, bu saatlarda Türkiyənin və siyasət dünyasının gözü CHP-nin Baş Qərərgahındadır.

“Qafqazinfo”nun məlumatına görə, Türkiyə Prezidenti Rəcəb Tayyib Ərdoğanın 18 illik fasilədən sonra CHP-nin Baş Qərərgahına səfəri Türkiyə siyasətində bahar yelləri əsdirib.

Belə ki, Ərdoğanın əsas müxalifət lideri Özgür Özəllə keçirdiyi iclasda mühüm məsələlərin müzakirə olunacağı gözlənilir.

Görüşdə iqtidar tərəfdən konstitusiyada nəzərdə tutulan dəyişikliklərin diqqət mərkəzində olacağı qeyd olunur.

Bunun fonunda siyasətdə yumşalma, TBMM gündəmi, pensiya və minimum maaş artımı, “Gəzi məhbusları”, Can Atalay, Konstitusiya Məhkəməsi və Avropa İnsan Haqları Məhkəməsi qərarları, qəyyumluq, bəzi bələdiyyə başçılarının terror qruplaşmaları ilə əlaqəsi, borc yükü və s. mövzuların da iclasın gündəmində olacağı bildirilir.

Qeyd edək ki, Türkiyə Prezidenti Rəcəb Tayyib Ərdoğan sonuncu dəfə 2006-cı ildə Baş nazir postunda vəzifələrini icra edərkən, CHP-nin o dövrdəki sədri, mərhum Deniz Baykalı ziyarət edib.

Həmin görüş Ərdoğanın CHP-nin binasına “Xeyirli olsun”a gəlməsi kimi də tarixə düşüb. Sözügedən iclasda siyasi liderlər bir-birlərinə qiymətli hədiyyələr bağışlayıblar.

Məlumat üçün deyək ki, AKP və CHP arasında “soyuq yellər”in əsdiyi tarixlər məhz Kemal Kılıçdaroğlunun “Cümhuriyyət” Partiyasına sədrlik etdiyi dönəmə (2010-2023) təsadüf edib.