23 sentyabr 2024-cü il tarixdə 29 nəfərdən ibarət bir qrup Güzdək kənd sakinləri şikayət ərizəsilə Müstəqil İctimai Nəzarət Agentliyinin MİNA tv.az saytına müraciət edərək bildiriblər ki, “Hüseynov Rasim adlı şəxs Abşeron rayonunun Güzdək kəndinin fərdi yaşayış evlərinin 150 metrliyində geniş ərazini zəbt edərək qanunsuz daş karxanası açmaq məqsədilə lazım olan texnika və avadanlıqları sözügedən əraziyə yerləşdirib. Yerli sakinlərin etirazlarına baxmayaraq, əlində heç bir qanuni sənədi olmayan R.Hüseynov sakinlərə əhəmiyyət vermədən hazırlıq işlərini davam etdirir və hətta hara istəsəniz şikayət edə bilərsiniz - deyir. Buna baxmayarq sakinlər qanun pozucusunun hazırlıq işlərini müvəqqəti olsa da dayandıra biliblər.” Üstəlik redaksiyamıza müraciət edərək bu qanunsuzluğun qarşısının alınmasında onlara kömək göstərilməsini xahiş edirlər.
Şikayət ərizəsi tərəfimizdən araşdırılarkən göstərilən faktlar təsdiqini tapdı. Hətta o da məlum oldu ki, Rasim Cəlil oğlu Hüseynov Güzdək kənd sakini deyil, qonşuluqda yerləşən Qaradağ rayonunun Korgöz qəsəbə sakinidir. Elə isə ona ünvanladığımız “hansı əsasla sizə aidiyyəti olmayan qonşu torpaq sahəsini zəbt etmisiniz, sözügedən ərazinin sizə məxsus olması barədə qanuni sənədləriniz varmı və əgər varsa o sənədləri bizə təqdim edə bilərsinizmi?”- suallarımıza “bəli var, iki günə gətirib təqdim edərəm”-deyə cavab verdi. Ancaq həmin gündən bir həftə ötməsinə baxmayaraq, R.Hüseynov nə sənədləri təqdim etmir, nə də telefon zənglərimizə cavab vemir.
Görəsən Rasim Hüseynov kimə arxalanır ki, nə torpaqlarını zəbt etdiyi kənd sakinlərini, nə Güzdək kənd İcra Nümayəndəsini, nə də kənd Bələdiyyəsinin sədrini eşitmir və bu rəsmi dövlət qurumlarının qanuni tələblərini yerinə yetirmir.
P.S. Növbəti günlərdə Güzdəkdə at oynadan Rasim Hüseynovun və onun arxasında duran gözəgörünməz əjdəhanın kimliyini müəyyənləşdirib ictimaiyyətə təqdim edəcəyik.
MİNA Tv.az-ın Araşdırma Bürosu

Video burda: My Webpage