Azərbaycan Respublikası Cinayət Məcəlləsinin 178.3.2-ci maddəsi ilə başlanmış 2262006027 nömrəli cinayət işi üzrə zərərçəkmiş şəxs kimi tanınan Dəniz Niftiyev mətbuata açıq müraciət ünvanlayıb.

Müraciətdə cinayət işi üzrə istintaqın gedişi, ərazi aidiyyəti, prokurorluq orqanlarının fəaliyyəti, eləcə də Rüfət Əsədov və Sadiq adlı şəxslərlə bağlı irəli sürülən iddialar yer alır. Qeyd edək ki, aşağıda təqdim olunan mətn müəllifin redaksiyamıza göndərdiyi müraciətdir və burada səsləndirilən iddialar müraciət sahibinə məxsusdur. Həmin müraciəti olduğu kimi sizlərə təqdim edirik.


MƏTBUATA AÇIQ MÜRACİƏT

Cinayət işi üzrə obyektiv istintaq və qanuni prosessual nəzarət tələbi

Mən, Dəniz Niftiyev, Azərbaycan Respublikası Cinayət Məcəlləsinin 178.3.2-ci maddəsi ilə başlanmış 2262006027 nömrəli cinayət işi üzrə zərərçəkmiş şəxs qismində tanınmışam. Buna baxmayaraq, mənə zərər vurmuş şəxslər bu günədək məsuliyyətə cəlb edilməyib və vurulmuş ziyan ödənilməyib.

Rüfət Əsədov və Sadiq adlı şəxslər mənim etibarımdan sui-istifadə edərək pulumu ələ keçiriblər. Quba rayonunun Üçgün kəndində istirahət mərkəzi tikmək üçün 2022-2023-cü illərdə Rüfət Əsədova ümumilikdə 400.000 manat vermişəm. O, torpağın bir sotunun 550 manata alındığını bildirsə də, sonradan real qiymətin 100-130 manat olduğunu öyrəndim. Tikintinin əsas hissəsi Rüfət Əsədovun adına rəsmiləşdirilmiş 68 sotda aparılıb; sonradan yalnız 27 sot mənim adıma keçirilib, 41 sot isə hələ də onun adındadır. Yasamalda ev tikintisi üçün verdiyim 215.000 manat müqabilində beş evin hamısı mənim adıma keçirilməli olduğu halda yalnız ikisi rəsmiləşdirilib, digər üç ev başqa şəxslərin adına keçirilib və satılıb. Yasamalda tikilmiş beş ev üzrə smetada torpaq və tikinti xərcləri 104.000 manat göstərilsə də, Rüfət Əsədov bu iş üçün məndən 215.000 manat alıb. Həmin məbləğin 100.000 manatı qaytarılıb, 115.000 manatı isə hələ də ödənilməyib. “Olympus” yaşayış kompleksindəki mənzilimin satışı üzrə razılaşdırılmış məbləğdən 80.000 manat da mənə verilməyib. Rüfət Əsədovun razılığı ilə hərəkət edən Sadiq adlı şəxs isə evə çıxarış alınması adı ilə məndən 10.000 manat alaraq yoxa çıxıb.

Yasamalda ev tikintisi üçün Rüfət Əsədova verdiyim 215.000 manatın və Sadiq adlı şəxsə verdiyim 10.000 manatın hamısı Binəqədi rayonu ərazisində təqdim edilib. Buna baxmayaraq, ərazi aidiyyəti barədə dəfələrlə müraciət etməyimizə baxmayaraq, cinayət işi Nərimanov Rayon Polis İdarəsində saxlanılır.

Nərimanov rayon prokuroru Hidayət Nurəlibəyov cinayət işinin Nərimanov rayonunda saxlanılmasına israr edir, ərazi aidiyyəti barədə vəsatətlərimizi nəticəsiz qoyur və zəruri istintaq hərəkətlərinin aparılmasını gecikdirir. Mənim qənaətimə görə, o, Rüfət Əsədovla Sadiq adlı şəxsi qanunsuz şəkildə himayə edir, onların məsuliyyətə cəlb olunmasına mane olur və cinayət işinə qanunsuz xitam verilməsi üçün məqsədli şəkildə hazırlıq görür.

Hidayət Nurəlibəyovun hərəkət və hərəkətsizliyindən Bakı şəhər Prokurorluğuna etdiyimiz şikayətlər müstəqil və obyektiv araşdırılmır, yenidən barəsində şikayət etdiyimiz Nərimanov rayon prokurorluğuna yönləndirilir. Hesab edirəm ki, Bakı şəhər Prokurorluğu Hidayət Nurəlibəyovun qanunsuz hərəkətlərinə göz yumur, onun mövqeyini faktiki qoruyur və cinayət işinin xitamına hazırlanmasına şərait yaradır.

Azərbaycan Respublikasının Prezidenti cənab İlham Əliyevə və Azərbaycan Respublikasının Baş prokuroru cənab Kamran Əliyevə açıq müraciət edirəm: cinayət işini şəxsi nəzarətə götürün; işə qanunsuz xitam verilməsinin qarşısını alın; ərazi aidiyyətinə obyektiv hüquqi qiymət verərək işin Binəqədi Rayon Polis İdarəsinə və ya qərəzsiz istintaq qurumuna verilməsini təmin edin; qeyd etdiyim bütün epizodları, istintaqdakı ziddiyyətləri, Hidayət Nurəlibəyovun və Bakı şəhər Prokurorluğunun aidiyyəti vəzifəli şəxslərinin hərəkətlərini araşdırın; Rüfət Əsədovla Sadiq adlı şəxsin məsuliyyətə cəlb olunmasını və mənə vurulmuş ziyanın ödənilməsini təmin edin.

Bir zərərçəkmiş kimi yalnız qanunun aliliyini, obyektiv istintaqı və pozulmuş hüquqlarımın bərpasını tələb edirəm. Ədalət təmin olunanadək bütün qanuni vasitələrdən istifadə edəcəyəm.

Dəniz Niftiyev
11 avqust 2026-cı il

Bu iddialarla bağlı aidiyyəti qurumların və adı çəkilən şəxslərin mövqeyini dərc etməyə hazırıq.