I hissə

Həyat sınaq məkanıdır, Tanrının dərgahınacan,
Ömür yolu imtahandır, doğulandan son anacan.
Ana bətnini tərk edən, hər bir insan qəbrə qədər,
Oxumalı, öyrənməli, hər şeyi tam qananacan.

Dədələrin həyat yolu, örnək olar övladlara,
Ata xeyir-duasıyla, yetişərlər imdadlara.
Ana haqqı müqəddəsdir, insanların üzərində,
Ata-ana diqtəsiylə, son qoyular fəryadlara.

Sadiq dostun paxıllığın, xain çəkər ömür boyu,
Şeytan kimi orda-burda bulandırar duru suyu.
Aşkarda da, gizlində də ifritətək maskalanar,
Ələ fürsət düşən anda, dərhal dosta qazar quyu.

Ona görə məqsədinə çatmaq üçün əz(i)mli ol,
Dost-aşnanı tanımaqçün, ürəyində çözümlü ol!
Özgələrə çox inanma, çalış güvən öz gücünə,
Düşmənini əzmək üçün iradəli, dözümlü ol!

Bir gözələ aşiq olsan, çalış könlün tez ələ al,
Özün necə sevirsənsə, bunu onun qəlbinə sal!
Elə ki bir ərən kimi, yetdin onun vüsalına,
Kişi kimi nazını çək, hər çətində qeydinə qal!

Yetimləri görən kimi, dərhal sığal çək başına,
Fəqirləri yedizdir ki, qalmasınlar tək başına!
Əgər gülsən bəxtsizlərə, öz taleyin küsər səndən,
Odur ki, heç xəsis olma, nəyin varsa tök başına!

Çox şeyləri bilsən belə, məsləhətli don gen olar,
Aqillərə qulaq assan, arzuların çin-çin olar.
Sadəliyin, şirin dilin cəlb eləyər yadları da,
El içində hörmətin də arta-arta min-min olar.

Ayaqlar altında qalıb, sınan ot-alaq olacaq,
Gövdələri əzilsə də, kökləri sağlam qalacaq!
Bu dünyadan axirətə, köç eləyən zalımların,
Məzarları üzərində, əbədi məskən salacaq.

İnsan oğlu halallıqla çəkməlidir zəhmətini,
Ki qazansın ölməmişdən, axirətin rəhmətini.
Əgər bunu eləmədən, halallığa haram qatsa,
Ömür boyu qazanacaq, el-obanın töhmətini.

Nə qədər ki həyatdasan, çalış yağı oyanmasın,
Nişan alıb tuşladığın, ox hədəfdən yayınmasın!
Yaqub Məğrur rica edir, dinlə ustad nəsihətin,
Aranızda pərdə saxla, heç kim üzə dayanmasın!

Yaqub Məğrur
15.08.2025-ci il