(“MƏĞRURNAMƏ”nin I cildindəki eyniadlı yazının davamı)

Deyirlər ki, yetmiş yaş ömrün müdriklik çağıdır. Bu hikmətli kəlama rəğmən, ustad qələm sahibi adını daşımaqla həyatımın yeddinci zirvəsinə çatmaqda olsam da, nə mənim, nə də digərlərinin nə qədər ömür yolu qaldığını, onu bəxş edən uca Tanrıdan başqa heç kim bilmir. Lakin keçdiyim xoş və keşməkeşli günlərlə dolu ömür yollarım barədə fikir bildirməyimin cəmiyyət üçün faydalı ola biləcəyini nəzərə alaraq, həyatımın bu və digər anları ilə bərabər, oxuyub öyrəndiklərim və görüb-eşitdiklərim əsasında təkmil hesab etdiyim bilgilərimi bəşər övladları ilə paylaşmaq istəyirəm.

İşgüzar aləmdə uğurun ən yüksək zirvəsinə çatıb varlanan insanın həyat tərzi başqalarının gözlərində həsədə səbəb olsa da, onun həyatında sevincli anları ilə bərabər, pis günləri də çox olur. Belə ki, sağlamlığını itirib xəstələnən varlı insan yataqda əzab çəkərkən, yaşadığı xoş günləri xatırlayıb anlayır ki, yenilməz ölümün qarşısını ala bilməyən var-dövlətin heç bir mənası yoxdur. İnsan yaxşı pul qazanmaq üçün hər vasitəyə əl ata və istədiyinə nail ola bilər. Ancaq öz xəstəliyini daşımağa razı ola biləcək özgə heç kimi tapa bilməz. Maddiyyatla hər şey tapıb almaq olar. Lakin bir şeyi itirdinsə, daha geri qaytarmaq mümkün olmur. Deməli, həyatı pulla satın almaq mümkünsüzdür. Odur ki, insan özünü əzizləməklə bərabər, digər şəxslərə də hörmətlə yanaşmağa çalışmalıdır.

İnsan yaşlandıqca daha ağıllı olur və tədricən anlayır ki, ən baha və ən ucuz qiyməti olan saatların hər ikisi eyni vaxtı göstərir. Eləcə də ən baha və ən ucuz pul qablarının hər ikisinə eyni məbləğdə pul yerləşdirmək olur. Yaxud da ən baha və ən ucuz avtomobillərin hər ikisi eyni yol və məsafə qət etməklə son təyinat nöqtəsinə çatır. Üstəlik on və yüz manatlıq şərab içənlər də eyni dərəcədə həzz alırlar. Hətta ən baha və ən ucuz təyyarədə uçanlarda da elə bir fərq olmur. Belə ki, uçaq qəzaya uğrayırsa, varlı da, kasıb da təyyarə ilə birlikdə yerə düşüb məhv olur. Deməli, var-dövlətindən asılı olmayaraq, insanın xoşbəxtliyi bu dünyanın maddiyyatından asılı deyil. Yalnız onu anlamaq vacibdir ki, güvəncli dostları və yaxınları olanlar əsl xoşbəxtlyə qovuşa bilirlər.

Odur ki, beş danılmaz faktı bəşər övladlarının nəzər-diqqətinə çatdırıram:

1.Uşaqları zəngin olmaları üçün deyil, xoşbəxt olmaları üçün tərbiyə etmək lazımdır. Xoşbəxtliyə nail olan uşaqlar böyüyəndən sonra sahib olduqlarının yalnız qiymətini deyil, dəyərini daha yaxşı bilərlər.

2.Yeməyi dərman kimi yemək lazımdır. Bunu edə bilməyənlər dərmanı yemək kimi yeyərlər.

3.Halal adamı sevənlərin onu tərk etməsi üçün yüz faizlik səbəb olsa belə, halal adamı tək qoymazlar.

4.İnsan olmaqla adam olmaq arasında çox fərq var. Çünki xisləti yalanla yoğrulmuş insandan fərqli olaraq, haqq adamı olmaq çox çətindir.

5.Yaxınlığa tez-tez yerimək istəyənlər tək, uzağa getmək istəyənlər birlikdə getsələr, daha çox fayda taparlar.

Ən çox faydası olan təbii müalicə üsulları isə aşağıdakılardır:

1. Kifayət edənədək vaxtaşırı Günəş şüaları qəbul etmək,

2. İstirahətə çox vaxt ayırmaq və yuxu rejiminə ciddi əməl etmək

3. Təmiz havada daha çox gəzmək və idmanla məşğul olmaq,

4. İnsanlarla ünsiyyət qurmaq və gülüşə çox vaxt ayırmaq,

5. Yağlı, qızardılmış və s. cəlbedici yeməklərdən pəhriz saxlamaq,

6. Öz gücünə əmin olmaqla şəxsiyyətə hörmətlə yanaşmaq,

7. Qardaştək güvəncli, qədirbilən və etibarlı dostlar tapmaq.

Hesab edirəm ki, sözügedən tövsiyyələrə və təbii üsullara həyatın müxtəlif dönəmlərində əməl edənlər xoşbəxt yaşayar və sağlam həyatdan həzz alarlar. Odur ki, bütün insanlara, eləcə də dünya Türklərinə xoşbəxt həyat tərzi və sağlam ömür sürməkdən həzz almağı arzulayıram.

Yaqub Məğrur
24.06.2025-ci il